ЗОДГОҲИ ШОИРИ ШАҲИР

Деҳаи Қаратоқ - зодгоҳи Шоири Халқии Тоҷикистон, устод Мирзо Турсунзода аст. Дар ин деҳаи хурд, ҷавониҳои шоир як замоне "сарфи хокбозию ҳарсаворӣ" гардида буданд. Вале чун шоир бузург шуд, номи зодгоҳашро ба дуриҳои дур бурд ва ба олам машҳур гардонд. То ҷое, ки агар ҳар кас ба Тоҷикистон меомад, ҳатман ба ин ҷо ташриф меовард ва зодгоҳи шоири бузургро зиёрат мекард. Ҳамдеҳагони шоир аз доштани чунин фарзанди бузург ифтихор мекарданду шоир аз доштани чунин ҳамдиёрон. Ҳамин буд, ки деҳаи Қаратоқ тавассути ин марди бузургу оламшумул ноаён ба як зиёратгоҳи оламиён табдил ёфт. Ҳоло ҳам ба ин ҷо одамони зиёде меоянду мераванд ва рӯҳи ин шоири бузургро болида медоранд.

Ҳамдеҳаи шоир, рӯзноманигори шинохтаи тоҷик Файзалии Шукур ба хотири гиромидошти ин марди бузург як китобе омода кардааст, ки дар он чанде аз хотираҳои дӯстони айёми ҷавонии шоир фароҳам омадаанд.

Дарвоқеъ, шинохтану донистани рӯзгори Қаҳрамони Тоҷикистон устод Мирзо Турсунзода, ин шахсияти нотакрор, ки "бо ҷаҳонгардӣ дар ҷаҳон машҳур буд" ва ҳамеша пайки сулҳу амониро аз як қитъа ба қитъаи дигар мебурд, барои ҳар фарди тоҷик аз фоида холӣ нахоҳад буд.

Умедворем, ки ин китоб манзури дилу писанди хотири хонандагон мегардад.

Муҳаррир.