БОБИ 19. СУҒУРТАИ ИҶТИМОИИ
КОРМАНДОН

19.1. Мафҳуми суғуртаи иҷтимоӣ

Низоми суғуртаи иҷтимоии кормандон дар Тоҷикистон дар солҳои охир бо тағйирёбии вазъи иҷтимоӣ-иқтисодии кишвар тадриҷан такмил ёфтаистодааст. Кӯмакпулиҳои суғуртаи иҷтимоӣ дар муносибатҳои меҳнатӣ яке аз дастгириҳои моддии асосӣ ба кормандон ҳангоми корношоямии муваққатӣ, ҳомиладорӣ ва таваллуд, бекорӣ ва вафоти аъзои оилаи корманди камбизоат ба шумор меравад.

Мутобиқи моддаи 359 Кодекси меҳнат, ҳамаи кормандон бояд ҳатман бо суғуртаи иҷтимоии давлатӣ фаро гирифта шаванд. Аз ин рӯ, онҳо тибқи шартҳо ва андозаи муқарраркардаи қонун ба ҳама гуна намудҳои таъминоти суғуртаи иҷтимоӣ ҳуқуқ доранд.

Кӯмакпулии суғуртаи иҷтимоӣ - ин пардохти ҳармоҳа, давра ба давра ва ё яквақтай пулие мебошад, ки дар ҳолатҳои муқарраркардаи қонунгузорӣ бо мақсади ҷуброни музди меҳнати аз дастдодашуда ва ё расонидани кӯмаки иловагии моддӣ ба шаҳрвандон таъйин карда мешавад.

Ҳаққи суғуртаи иҷтимоӣ аз ҷониби корфармоён
пардохт карда мешавад. Азбаски суғуртаи иҷтимоӣ дар
як вақт ҳамчун андози иҷтимоӣ ҳисобида мешавад,
тартиб ва ҳаҷми онро Кодекси андози Ҷумҳурии
Тоҷикистон муқаррар намудааст. Маблағҳои суғуртаи
иҷтимоии давлатӣ тибқи шартҳо ва тартиби Қонуни