ДАВЛАТИ
ХОРАЗМИ БОСТОН

Хоразми Бостон яке аз куҳантарин давлатҳои мардуми эронитабор ва аз ҷумлаи нахустин давлатҳои таърихии ниёгони тоҷикон дар Осиёи Марказӣ буда, ҳудудҳои поёноби дарёи Ому, қисми шимолии Ўзбекистон ва ҷанубу ғарбии Қазоқистони имрӯзаро дар бар мегирифтааст. Ёдгориҳои бостоншиносӣ гувоҳӣ медиҳанд, ки сарзамини Хоразми Қадим макони будубоши ориёитаборон буда, аз даврони куҳан то асрҳои аввали ислом дар ихтиёрашон буд.

Оид ба Хоразм ва ҳудудҳои таърихии он, яъне Марву Насо дар китоби муқаддаси Авесто ба таври зерин омадааст: «Моуру (Марв)-и тавоно ва ростипараст», «Нисайя, ки байни Моуру ва Бахдӣ воқеъ аст». Хоразм дар Авесто ҳамчун кишвари чорум зикр шуда бошад ҳам, баъзе авестошиносон сарзамини паҳновари ориёиён Хванирасро ба Хоразм нисбат медиҳанд. Инчунин дар Катибаи Бесутуни Дорои Кабир саркӯб гардидани ошӯбгарон дар Марву Порт ва сакоиҳои канори Хоразм зикр шудааст. Ҳеродот овардааст, ки сатрапи Хоразм якҷоя бо вилоятҳои Суғду Порт ба хазинаи давлати Ҳаромашиниён 300 талант нуқра (1 талант баробари 34 кг) месупурдаанд.