г) Аз асоси муқобилмаънои замони гузаштаи феъл:
Даромад-баромад аз майдони хонаи калон, ки дар байни ду хона муштарак буд... (Ҷ. Икромӣ, Духтари оташ). Ин да-ромад-баромади ҳамсоягонро мушкил кард (Ҳ. Ирфон, Дар кулбаи косибон).

д) Такрор шуда омадани як исм:
Сонитар гап-гап баромад, ки Ҳошим Қорвон... қасам хӯрда будааст (С. Улуғзода, Навобод).

ж) Бевосита такрор шудани калимаҳои тақлидӣ. Калимаи тақлидӣ дар ду шакл такрор шуда меояд:

1. бевосита такрор шудани худи ҳамон як калима, ки бо ин роҳ тарзи воқеъшавӣ ва давомнокии амалу ҳолат ифода меёбад:
   Дукур-дукури аспҳо торафт наздик мешуд (С. Улуғзода, Субҳи ҷавонии мо). Шабҳо дар хобаш медид, ки чӣ тавр вай ресмони бодбараки пурзӯр ва саркашро дар даст дошта ва аз дар-дару ғаж-ғажи вай лаззат мебарад (Ҷ. Икромӣ, Духтари оташ). Дар ин ҷо ғайр аз шитир-шитири дар ҷӯйбуда садои дигаре шунида намешуд (С. Айнӣ, Ғуломон). ...миш-миш шуду миси кор баромад (газ. «Маориф ва маданият»). Ӯ бо даромада салом додани ман пичир-пичирашро монда, дастҳояшро бар рӯ кашида ба саломи ман ҷавоб гардонд (С. Айнӣ, Куллиёт).

Кард падрудам садои обшор
Қаҳ-қаҳи мастонаи кабки дарӣ.
Шир-шири оби равони ҷӯйбор.

(«Садои Шарқ»)

Саргарми чак-чақ чойро ҳам фаромӯш кардаам (С. Айнӣ, Ғуломон). Аз гӯшаки телефон ғинг-ғинги фосиладори маҳзунонае ба гӯш мерасид («Садои Шарқ»). Хомӯшии ин саҳрои мурдаи пурбарфро ҳам танҳо қар-қари зоғҳо халалдор мекард (С. Айнӣ, Куллиёт).

2. бевосита такрор шудани калимаи асосии тақлидӣ ва дар шакли тағйирёфта омадани ҷузъи дуюм. Дар ин гуна мавридҳо ба ҷои садоноки а-и калимаи асосӣ дар ҷузъи дуюм садоноки у меояд, ки бо ин роҳ на танҳо фосиладории амалу ҳолат, балки дар ин калимаҳо дуруст ва айнан акс наёфтани он садоҳо, ҳодисаҳои табиӣ низ ифода меёбад:

Вақар-вукур накунед, тезтар номаша гӯй (С. Улуғзода, Калтакдорони сурх). Тапар-тупури бисёре карда гаштаанд, — гуфт Ҳайдарқул, — локин аз куҷо медонанд, ки ин кор кори зани кист (Ҷ. Икромӣ, Духтари оташ). Шалап-шулупи сина-занӣ фазои майдонро фаро гирифта, то хеле роҳ шунида мешуд (Ҳ. Ирфон, Дар кулбаи косибон).