Ҳисоби лутфомези ману модаркалон ба қиёмат монд…
Барои аввалин моҳона, ки маро пеши гузаштагон мадюн медорад, ба Латофати азиз, сипос!

АВВАЛИН КИТОБ

Бо гузашти давр, муаллима ба нафақа рафта, маҷаллаи «Истиқбол»-ро ба каси дигар супурд. Аммо нашриёти «Истиқбол»-ро ҳанўз ҳам раисӣ мекунад.
Соли 2015 Шоири халқии Тоҷикистон Муҳаммад Ғоиб, ки он замон сардабири Нашрияи расмии Ҷумҳурии Тоҷикистон - рўзномаи «Ҷумҳурият» буд, маро ба кор даъват кард. Шод шудам, аммо пеш аз хулоса баровардан, ба назди муаллима шитофтам. Зеро дар нашриёти «Истиқбол» ҳанўз ҳам шартномавӣ кор мекардам. Муаллима бо табассум ҳарфҳои маро гўш карда, бидуни дудилагӣ ҳуҷҷатҳоямро аз қайди «Истиқбол» бароварда ва барои равнақи корам дар муҳити нав ва ҷиддӣ барору комёбӣ орзу кард.
Барои дар «Ҷумҳурият» сари кор омаданам низ ҳиссаи муаллима бузург аст.
Зеро маҳз ба сафари Бадахшон бурда, дар давоми саёҳат маро ба муовини сармуҳаррири «Ҷумҳурият» Ато Мирхоҷа ҳамчун «қаламкаши ояндадор» муаррифӣ карда буданд. Ниҳоят бо пайдо шудани фурсати муносиб устод Ато Мирхоҷа пеши устод Муҳаммад Ғоиб барои ман минёнаравӣ карданд ва ман то ҳанўз ходими «Ҷумҳурият» ҳастам.
Барои инсонҳои нағзу хайрандеше, ба монанди Муҳаммад Ғоиб, Ато Мирхоҷа ва Латофат ҳазорон бор сипос! Бо будани чунин одамони дарёдил замин ҳанўз ҳам побарҷост ва мафҳуми одамият ҳанўз ҳам дар ҷилдҳои фарҳангу қомуси дили мо нафас мекашад.
Муҳити озоду озодаи «Ҷумҳурият» имкон фароҳам овард, ки китоби аввалинам - «Ҳамболи турнаҳо» таҳия шуда, бо иқдоми муаллимаи азизам Латофат Кенҷаева интишор ёбад.