Куйбек Шарифзода. Таронаҳои дарё (шеърҳо).

ДАВЛАТИ ҶОВИДОНИ МО

Давлати ҷовидони мо,
Роҳати ҷисму ҷони мо,
Файз ба хонадони мо,
Ваҳдати ҷовидон бувад.

Равшании чароғи мо,
Сабзаи боғу роғи мо,
Марҳами дарду доғи мо,
Ваҳдати гулфишон бувад.

Қуввати мо, мадори мо,
Хубии рӯзгори мо,
Фасли гулу баҳори мо,
Ваҳдати бехазон бувад.

Давлати мо, Ваҳдати мо,
Меҳнати мо, роҳати мо,
Хислати мо, одати мо,
Ваҳдати олишон бувад.

Нур ба дидаҳои мо,
Гуфту шунидаҳои мо,
Шаҳду чашидаҳои мо,
Ваҳдати дилситон бувад.

Байту таронаҳои мо,
Чангу чағонаҳои мо,
Нур ба хонаҳои мо,
Ваҳдати ҷовидон бувад.