Эй кош, Худо, туро бубинам
Як бори дигар, ту дар куҷоӣ?
Хоҳар ба фиғону оҳу нола,
Ду дида ба дар, ту дар куҷоӣ?
Аз хона чӣ гуна мебароям
Бе ту ба сафар, ту дар куҷоӣ?
Эй, бар сари хоки тар занам бар,
Ҳо, рафта зи бар, ту дар куҷоӣ?
Фарёд, ғами ту хоки моро
Кардаст ба сар, ту дар куҷоӣ?
Эй додари ҷон, ту кай дароӣ
Як бор зи дар, ту дар куҷоӣ?
Ғам теғ занад ба синаи ман,
Эй синасипар, ту дар куҷоӣ?
Фарзанд намондаӣ нишона,
Ногашта падар, ту дар куҷоӣ?
Дар синаи ман зи доғат, эй вой,
Оташ зада сар, ту дар куҷоӣ?
Бар сурати ту бигиряде зор
Бечора падар, ту дар куҷоӣ?
Эй кушта ба тиру теғи хунмаст,
Теғам ба ҷигар, ту дар куҷоӣ?

Эй додари ҷон, ту дар куҷоӣ?

Эй додари ҷон, ту дар куҷоӣ?
Беҳ аз ду ҷаҳон, ту дар куҷоӣ?
Бо зӯри камон гирифта рафтанд,
Оҳ, аз сари нон, ту дар куҷоӣ?
Эй, дар даҳанат ба нола дармонд
Як нолаи нон, ту дар куҷоӣ?
Байту ғазалат гириста гӯям,
Оташ ба забон, ту дар куҷоӣ?
Печидаву баста дар гулӯям
Фарёду фиғон, ту дар куҷоӣ?