Моро, ки нигаҳ намекунӣ ту

Моро, ки нигаҳ намекунӣ ту,
Чун рӯй ба раҳ намекунӣ ту?!
Раҳро бинигар, яке наафтӣ,
Ношукрии раҳ намекунӣ ту?!
Моро ту агар накуштаниӣ,
Поро чӣ бараҳна мекунӣ ту?!
Хокам ба саро, маро гирифта
Хоки сари раҳ намекунӣ ту?!
Гар ҳаст ягон каси Худоҷӯ,
Ку пурс, гунаҳ намекунӣ ту?!
Кӯтаҳ лаби доманат ки кардӣ,
Як лабша ду таҳ намекунӣ ту?!
Таҳ карда барӣ нигоҳи моро,
Савганд, гунаҳ намекунӣ ту!
Гӯё ки маро надидаӣ ту,
Хушрӯ чӣ нигаҳ намекунӣ ту?!
Ҳар ду бари рӯи нозанинат
Чун лахча сияҳ намекунӣ ту?!
Хушрӯй арӯс карда худро,
Ин баччара шаҳ намекунӣ ту?!
Имрӯз, ки мекушӣ ба нозаш,
Сад нола пагаҳ намекунӣ ту?!

Дидем турову гов гаштем

Дидем турову гов гаштем,
Сар гашту ҳазор тов гаштем.
Аз пушти чаро ба пушта рафтем,
Мулки руту пут, харов гаштем!
Ҳай карда маро якеву овард,
Гум гашта, Худо, дар ов гаштем.
Ку хобу хаёлҳои ширин?
Беёду хаёлу хов гаштем.
Дар чашми банози ту алове!
Эй сӯхта сахт, алов гаштем!