7. Муносибатҳои оид ба масъулияти моддии корфармоён ва кормандон дар соҳаи меҳнат низ ба қатори муносибатҳои марбут ба меҳнат дохил карда мешаванд. Тарафи шартномаи меҳнатӣ (корфармо ё корманд), ки ба тарафи дигар зарар расонидааст, ин зарарро тибқи КМ ҶТ ва дигар қонунҳо ҷуброн мекунад.

8. Муносибатҳои вобаста ба ҳалли баҳсҳои меҳнатӣ метавонанд вобаста ба мавзӯи баҳс қабл аз муносибатҳои меҳнатӣ бошанд, онҳоро ҳамроҳӣ кунанд ва ё пас аз онҳо ба вуҷуд оянд (масалан, даъвоҳои шаҳрвандон дар бораи рад кардани бастани шартномаи меҳнатӣ - қаблӣ, дар бораи аз кор дур кардан - ҳамроҳӣ ё дар бораи барқарор кардан ба кор дар робита бо озодшавӣ аз кор - минбаъда).

9. Муносибатҳои суғуртаи иҷтимоӣ, ки марбут ба таъйин ва пардохти кӯмакпулиҳои суғуртаи иҷтимоӣ мебошанд, бо муносибатҳои меҳнатӣ якҷоя ва пас аз онҳо ба вуҷуд меоянд. Мисол, кӯмакпулӣ барои давраи корношоямии муваққатӣ бо муносибатҳои меҳнатӣ якҷоя ва пардохти нафақаи меҳнатӣ бошад, пас анҷоми муносибатҳои меҳнатӣ ба вуҷуд меоянд.

Ҳамин тариқ, предмети ҳуқуқи меҳнат аввалан, тавассути муносибатҳои меҳнатӣ ва баъдан тавассути дигар муносибатҳое, ки бо муносибатҳои меҳнатӣ робитаи зич доранд, ташаккул меёбад. Онҳо якҷоя доираи ҳуқуқи меҳнатро ҳамчун як соҳаи мустақили ҳуқуқ муайян мекунанд.