Тартиби ҳалли баҳсҳои меҳнатии коллективӣ ба муқаррароти Тавсияи ТБМ № 92 "Дар бораи созиши ихтиёрӣ ва арбитраж" (1951) асос ёфтааст.

Моддаи 1 КМҶТ баҳси меҳнатии коллективиро ҳамчун ба мувофиқа нарасидани корфармоён (намояндагони онҳо) ва коллективи кормандон (намояндагони кормандон) оид ба масъалаҳои муқаррар намудан ва тағйир додани шароити меҳнат, бастан ва иҷрои созишнома ва шартномаҳои коллективӣ, инчунин татбиқи муқаррароти КМ ҶТ, дигар санадҳои меъёрии ҳуқуқии Ҷумҳурии Тоҷикистон, созишнома ва шартномаҳои коллективӣ, муайян намудааст.

Аз ин таъриф як қатор хусусиятҳоеро ҷудо кардан мумкин аст, ки ба баҳсҳои меҳнатии коллективӣ хосанд. Якум, барои ба миён омадани баҳси меҳнатии коллективӣ талабот бояд аз ҷониби коллективи кормандон пешниҳод карда шавад. Дуюм, тафовут дар мавзӯи баҳс аст. Ихтилофи назар байни корфармо ва коллективи кормандон метавонад бо яке аз сабабҳои зайл ба миён ояд: муқаррар ва тағйир додани шароити кор; бастан, тағйир додан ва татбиқи шартномаҳои коллективӣ, созишномаҳо, аз ҷониби корфармо ба назар нагирифтани пешниҳоди мақоми намояндагии кормандон ҳангоми қабули санадҳои локалӣ.

Ҳалли баҳси меҳнатии коллективӣ метавонад танҳо бо ташаббуси кормандон ё намояндагони онҳо, ки тибқи қоидаҳои муқаррарнамудаи КМ ҶТ муайян шудаанд, сурат гирад.