Тоҷикистон ва принсипҳои ҳуқуқи меҳнат дар меъёрҳои КМ ҶТ ҳангоми муқаррар намудани ҳуқуқи корманд ба ҷои кори мувофиқ (моддаи 129 КМ ҶТ), таъмини ҳуқуқи кормандон ба ҳифзи меҳнат (боби 37 КМ ҶТ) ва ӯҳдадории корфармо оид ба таъмини шароити меҳнати ҷавобгӯ ба талаботи меъёрҳои давлатӣ оид ба ҳифзи меҳнат (моддаи 348 ва дигар моддаҳои КМ ҶТ) ифодаи худро ёфтаанд. Ҳифзи меҳнат ҳамчун як институти ҳуқуқи меҳнат меъёрҳоеро дар бар мегирад, ки ба муайян кардани тартиби ташкили шароити солим ва бехатари кор ва мувофиқан муқаррар намудани стандартҳои бехатарии меҳнат, қоидаҳои техникии бехатарӣ ва гигиенаи меҳнат, ӯҳдадориҳо оид ба риояи талаботи давлатии меъёрӣ дар ҳама намудҳои фаъолият, ӯҳдадориҳои тарафҳои муносибатҳои ҳуқуқии меҳнатӣ дар соҳаи ҳифзи меҳнат, инчунин таъмини ҳуқуқи кормандон ба ҳифзи меҳнат равона шудаанд. Ғайр аз ин, самтҳои асосии сиёсати давлатӣ дар соҳаи ҳифзи меҳнат, идоракунӣ ва ташкили ҳифзи меҳнат ва тақсимоти ваколатҳо байни мақомоти давлатӣ дар соҳаи идоракунии давлатии ҳифзи меҳнат, муайян карда шудаанд.

Маъмулан ба институти ҳифзи меҳнат меъёрҳои муқарраркунандаи қоидаҳои махсус оид ба ҳифзи меҳнати занон, шахсони ноболиғ, маъюбон марбутанд, ҳарчанд дар КМ ҶТ ҳифзи махсуси меҳнати онҳо дар меъёрҳои фасли III «Хусусиятҳои танзими меҳнати гуруҳи алоҳидаи кормандон» дарҷ ёфтаанд.