МУҚАДДИМА
Забони барномасозии Python воситаи универсалӣ барои таҳияи барномаҳои таъйиноти гуногун буда, омӯзиши он ҳатто барои навомӯзон дастрас ва қулай аст. Навишти нисбатан содаи он ба хонанда имкон медиҳад, ки бештар ба моҳияти масъала ва тартиби ҳалли он диққат диҳад.
Бо Python метавон ҳисобҳо анҷом дод, додаҳоро коркард кард, барномаҳои хурд ва тасвирҳои графикӣ сохт.
Омӯзиши барномасозӣ аз фаҳмидани масъала оғоз мешавад. Пеш аз навиштани рамз бояд муайян кунем, ки кадом додаҳо маълуманд, чӣ натиҷа лозим аст ва бо кадом қадамҳо ба он мерасем. Ин пайдарпайии қадамҳо алгоритм ном дорад.
Дар ин дастур аввал алгоритмҳо, тағйирёбандаҳо ва навъҳои додаҳо омӯхта мешаванд. Сипас операторҳои шартӣ, даврҳо, функсияҳо ва сохторҳои асосии додаҳо баррасӣ мегарданд. Дар мавзӯъҳои минбаъда кор бо графика, рекурсия, ҷустуҷӯ, мураттабсозӣ ва матритсаҳо пешниҳод мешавад.
Барои аз худ кардани ҳар мавзӯъ аввал шарҳро хонед, баъд мисолро дар муҳити Python иҷро кунед. Додаҳои мисолро тағйир диҳед ва натиҷаро муқоиса намоед. Дар охир супоришҳои мустақилонаро ҳал кунед. Агар барнома хато диҳад, сатри нишон додашуда, номи тағйирёбандаҳо, қавсҳо, нохунакҳо ва фосилаҳои аввали сатрро санҷед.
Кор бо файлҳо ва барномасозии объектгаро мавзӯъҳои омӯзиши минбаъда мебошанд ва дар ин дастур ба таври алоҳида баррасӣ намешаванд.