месозад. Дарахт бо забони ҳол ба ӯ мегӯяд: «Эй ситамгари дилозор, чаро ба табари озоғ бунёди ҳаёти моро зери забар месозӣ ва мардумро аз роҳати сояву манфиати меваи ман маҳрум мегардонӣ?»

Макун бадӣ, ки бадиро ҷазо бадӣ бошад, Ба кеши аҳли мурувват бадӣ дадӣ (даррандагӣ) бошад.

Муш ба зории ӯ илтифот нанамуда, ба ҳамон ҷафокорӣ машғул буд, ки ногоҳ Море даҳон кушода, аз камин берун баромад ва ба як дам ӯро фурӯ бурд. Сиёвуш аз ин сурат таҷрибаи дигар бардошт ва донист, ки озоранда ҷуз озор набинад ва нишонандаи хор гули мурод начинад.

Бад мекунию нек тамаъ медорӣ,
Ҷуз бад набувад сазои бадкирдорӣ.

Дар ҳамин ҳол, ки Мор аз хӯрдани Муш фориғ шуда, дар сояи дарахт ҳалқа зад, хорпуште даромад ва думи мор ба даҳон гирифта, сар даркашид.
Мор аз сояи изтироб худро ба вай мезад, то ҳама аъзояш ба нӯги хори ӯ сӯрох шуда ҷон дод. Чун мор аз кор биафтод, Хорпушт сар бурун оварда, рӯдаҳои ӯро бихӯрд ва сар дар пардаи пинҳонӣ кашида, дар рӯи саҳро монандӣ тӯбе биафтод. Ногоҳ рӯбоҳи гурусна ба он ҷо расида, Хорпуштро дид ва ӯро ба пушт афканда, қатрае чанд аз пешоби худ дар шиками вай рехт. Хорпушт ба хаёли он, ки ин борон аст, сар берун овард. Рӯбоҳ дарҷаст ва ҳалқаш гирифту сараш барканд ва боқии аъзоро бо иштиҳои тамом бихӯрд. Дар ин асно Саги ҷаҳанда аз гӯша даромада Рӯбоҳро аз ҳам бардарид ва порае аз ӯ хӯрда дар гӯшае бихӯфт. Ногоҳ Паланге дид, ки аз як гӯшаи беша берун давид. То Сагро хабар шуд, ки бо неши ҷоншикор дилашро аз сина берун кашид. Иттифоқо, Паланг аз камингоҳи Сайёде берун ҷаста буд ва Сайёд бо тири дар камон кашида дар паи ӯ нишаста буд. Чун Паланг машғули дидани Саг дид, ба ҷониби ӯ тир афканд ва ӯро бикушт. Ҳанӯз Паланг ба тамоми аз пой дар наомада, Сайёд пӯсти ӯро даркашид. Дар ин вақт Саворе ба он мавзеъ расида, ба пӯсти Паланг тамаъ дарбаст. Онҳо ҳарду ба муқотилаю муҷодала даромаданд. Савор шамшери обдор кашида, ба сари Сайёд тохт ва сари ӯро бурида, пӯсти Палангро аз замин даррабуд ва рӯй ба роҳ овард. Ҳанӯз қариб сад қадам нарафта буд, ки аспаш пешпо хӯрд ва савор нагунсор афтода гарданаш шикаст.