Бузургмеҳри Тоҷиддин

---

Шаби бедории ман хоб кардӣ,
Маро ҳамсуҳбати маҳтоб кардӣ.
Надонистам қиёмат карданатро,
Дили пуроташамро об кардӣ.

---

Агар чун офтоби Шарқ гардӣ
В-агар чун маҳ ва ё чун барқ гардӣ,
Намон по бар лаби дарёи ин дил,
Ки метарсам, мабодо, ғарқ гардӣ.

---

Агар ишқи ту чун ишқи Зулайхост,
Ба сад пирӣ туро уммеди фардост.
Чу Юсуф ман туро хоҳам саранҷом,
Ки дар ин ишқ ишқи поки Яктост!

---

Туро то он даме ёрат наронад,
Ки аз ин хат хатоятро нахонад.
Машав аз ман хавотир то ҳамеша,
Ки танҳоӣ маро танҳо намонад!

---

Зи фахри асли худ сар бар само бош,
Дуо гӯям, сазовори дуо бош.
Аё ҷони падар, ҳамчун Шакурӣ
Замони хешро Садри Зиё бош!

---

Шаб асту суҳбатам бо моҳтоб аст,
Ба сад пурсиш зи нураш як ҷавоб аст.
Ту ойӣ субҳу бегоҳӣ равӣ боз,
Магар ҳамсояи ту офтоб аст?!