Дили ойинабанд

---

Зи чашмонам чу рӯзи хуш ниҳонӣ,
Шаби зулматсириштамро надонӣ.
Барои диданат як умр гирям,
Биё чун ашк боре ногаҳонӣ.

---

Бикардӣ ҷабр бисёру вафо не,
Бидодӣ дард бисёру даво не.
Зи дунё як туро мехоҳаму бас,
Зи ман дунё бихоҳиву маро не.

---

Зи ишқам бехабар рафту наомад,
Ба мисли раҳгузар рафту номад.
"Хатар дорад ҷудоӣ", - шоире гуфт,
Ба он роҳи хатар рафту наомад...

---

Ватан чун домани модар азиз аст,
Ватан монанди бому дар азиз аст.
Макун санги Ватанро пешпоӣ,
Ки чун болин ба зери сар азиз аст.

---

Маро ҳам ёри хубе як замон буд,
Азизам чун замину осмон буд.
Ҷаҳон аз ман ҷудояш кард охир,
Барои ман, ки беҳтар аз ҷаҳон буд.

---

Бигӯ, модар, каме аз кӯдакиҳом,
Ки мехоҳам даме аз кӯдакиҳом.
Манам имрӯз саргардони олам,
Ки гум шуд оламе аз кӯдакиҳом.
Бузургмеҳри Тоҷиддин

---

Кунад одам ба одам носипосӣ,
Биҷӯяд то абад аз ҳам халосӣ,
Ки аз рӯзи нахустин илми дунё
Нашуд оғоз бо Одамшиносӣ.

---

Дилам дар роҳи ишқат хаста гардад,
Агар бо дарду ғам вобаста гардад.
Барои дидани ман чашм бикшо,
Ки чашми душмани ман баста гардад.

---

Бувад ин сӯву он сӯйи Ватан санг,
Маро гаштаст аз ин рӯ ҷону тан санг.
Гар аз ман пештар асло набудӣ,
Зи номардӣ ба пушти ман мазан санг!

---

Хазон ҳам дошт қадре пеши ёрон
Ба рӯйи зарди худ чун дӯстдорон.
Зимистон меравад бебарф, аммо
Наояд бе гулу сабза баҳорон!

---

Бигӯ, то кай замин ҳасту замон ҳаст?
Бигӯ, то кай ҳамин ҳасту ҳамон ҳаст?
Ироқу Сурия оромгаҳ шуд,
Бигӯ, то кай камин ҳасту камон ҳаст?!

---

Ҷавон будам агар, баҳри ту будам,
Ҷаҳон будам агар, баҳри ту будам.
Ҳаминам ман, ки баргаштиву дидӣ,
Ҳамон будам агар, баҳри ту будам.

---

Хазон рӯйи раҳам резад, ки марг аст,