Бузургмеҳри Тоҷиддин

---

Шаби ман бо шаби ту рӯз дорад,
Лаби ман бо лаби ту сӯз дорад.
Баҳор имсол рӯйи домани туст,
Ки бо ойини нав Наврӯз дорад.

---

Куҷо рафтӣ, ки аз ёдам нарафтӣ,
Зи дил бо доду фарёдам нарафтӣ.
Шаби маргам зи ҳасратҳои ёрон
Чу рӯзи неки мелодам нарафтӣ.

---

Дареғо, ки набудам ҳамдами худ,
Накардам зиндагӣ дар олами худ.
Ба ғамҳои ту умрам гашт охир,
Фақат мондаст мурдан бо ғами худ.

---

Маро ғам додаву шодӣ талаб кард,
Ғуломӣ доду озодӣ талаб кард.
Қалам бишкасту дафтар сӯхт, аммо
Барори кори эҷодӣ талаб кард.

---

Аз ин ҷо рафтани худро набахшӣ,
Ба сад по рафтани худро набахшӣ.
Чунон аз бозгаштан мекунӣ шарм,
Ки асло рафтани худро набахшӣ.

---

Яке мирад зи дарду дигар аз ғам,
Падар мирад зи дарду модар аз ғам.
Бародарро вабо андар сафар кушт,
Даруни хона мирад хоҳар аз ғам.