Падари Конфутсий Шулиян Хэ, аз оилаи ашрофони зинаи поёнӣ буда, молу мулки фақирона дошт. Худи Конфутсий баъдан менависад, ки давраи кӯдакии фақирона гузаронидааст. Бинобар ин, маҷбур шудааст, ки ба ҳар гуна корҳои майда-чуйда сару кор гирад. Ҳатто шеър хонда косаи хайрияро дар наздаш мегузошт, бо ин роҳ расму русуми ҷамъиятиро ба вуҷуд оварад. Сабаби асосии пайдоиши ин маросимро аксари тадқиқотчиён ба модари ӯ нисбат медиҳанд. Ҳанӯз дар синни 17-солагӣ модари Конфутсий аз дунё мегузарад, ки барои ӯ хеле зарбаи сахт буд. Баъд аз марги модар зарбаи дуюмро Конфутсий вақте мехӯрад, ки яке аз авлодони шоҳ Цзи Сунши ба меҳмонӣ одамони рутбаи Ши-ро даъват менамояд. Падари Конфутсий ба ин рутба дохил мешуд, аммо вақте ӯ ба назди қаср меояд, ба хотири аз авлоди паст ба дунё омадани модараш, ӯро намегузоранд, ки ба дохил дарояд. Ин зарбаи вазнин ба дили нозуки ин донишманд буд, ки дар ҷавонӣ ҷаҳонбинии баландро соҳиб гашта буд. Намуди зоҳирии ин донишманд низ фарқкунанда, қадаш 1,91м ва намудаш гандумранг будааст. Дар синни 19-солагӣ хонадор шуда, баъди як сол писардор мешавад. Мувофиқи қарордоди Сима Цяню донишманд ба хизмати даргоҳи Цзи ба вазифаи посбони анбори ғалла таъин карда мешавад. Дар синни 28-солагӣ якумин маротиба ӯ дар тантанаи қурбоникунӣ дар дарбори шоҳи Лу иштирок мекунад. То ин замон аллакай овозаи донишмандии Конфутсий паҳн шуда буд. Яке аз тамошобинон оиди моҳияти ҳар як амалиёти қурбонӣ аз ӯ мепурсад, ки кадоме аз инҳо маросим мебошад? Конфутсий дар ҷавоб мегӯяд, ки ин пурсиши пайдарпаи шумо аллакай худаш маросим аст. Баъдан, ин усули пурсиш яке аз усули таълимии донишманд мегардад. Устод шогирдонро чунин таълим медод, ки «Агар донед, гӯед, ки медонам, вагарна гӯед, ки намедонам».

Мувофиқи маълумоти дигар устод аз санъати мусиқӣ хеле бархӯрдор будааст. Чуноне ки худи ӯ менависад, «ман аз суруд меболам, такягоҳро дар маросим мебинам ва мусиқиро ба охир мерасонам» ё дар ҷои дигар менависад: «Агар дар инсоният накукорӣ, ки ба одамӣ тааллуқ дорад, намебуд, пас мусиқӣ барои чӣ лозим аст?». «Ақл дар асоси хондан ва хислат дар баробари қоидаҳои рафтори ташаккул миёбад, аммо маълумоти пурраро мусиқӣ медиҳад».