-Аз нигоҳи хеш шумо чунин муносибати сардро чӣ гуна шарҳ медиҳед?
-Ҳеҷ гуна. Кабӯтар бо кабӯтар, ғоз бо ғоз...
-Агар чунин аст, чаро аз кор нарафтед?
-Дар замоне, ки ҳатто нафарони дипломи олидор ҷойи кор намеёбанд, банда бо маълумоти синфи 9 ба куҷо мерафтам? Ҳарчанд дар дохили он катакчаи шишагин нишастан ба ҷонам задааст.
-“Кор рӯсурхии инсон” гуфтаанд ва бубинед, ки бе рухсати шумо паша ҳам вориди ин бино шуда наметавонад.
-Ин танҳо аз нигоҳи аввал аст.
-Дар асл чӣ?
-Шумо - ку бе рухсати банда то ба ошёнаи ҳафтум баромадед, магар ҳамин муаррификунандаи кори мо нест?
-Яъне, назорат ба талабот ҷавобгӯ нест?
-Ҳар чӣ пиндоред.
-Дари асосии бино бо қулфи рақамӣ муҷаҳҳаз гардонида шудааст. Мегуфтед коди он чанд вақт пас иваз карда мешавад?
-Ҳар ду - се моҳ пас.
-Акбар Ҳакимович! - аз остонаи дари хонаи хоб садо дод ташхисгари тиббӣ - судӣ ва ман хизматгордухтарро ба ҳоли хеш гузошта аз дар баромадам.
-Мутаассифона, тасодуфан рух додани ҳодиса тасдиқи хешро наёфт, - гуфт нафаре, ки сабабгори кандани муколамаи ман ва Сабоҳат гашта буд.
-Яъне, куштор?
-Куштор.
-Аз нигоҳи шумо мо бояд чиро ҷустуҷӯ намоем?
-Асбоби кундалангеро, ки кунҷҳояш тез нестанд.
-Аниқтараш.
-Мо бо далелҳо сару кор дорем ва модоме ки далел нест, чӣ ҳам метавон гуфт.

• Хеле мутаассифам, ки ташхис ба ҷуз кундаланг будани олоти ҷиноят ягон ҳолати дигарро пайдо карда натавонист.
  -Мо аз ҷой ҷароҳатгирифтаи мақтул шишапораҳои майдаи дар хун олудашударо пайдо намудем, вале чун худи шишаро ҳамчун олоти ҷиноят пайдо карда натавонистем, ин бозёфтамон ҳам шубҳаро пайдо мекунад.