Тафтишот донистан мехост, ки Дороб Қамарро сарвате ҳаст ё на? Маҳз ба ҳамин хотир тайи даҳ соати охир гурўҳи назорати таъҷилӣ чун соя бо вай ҳамроҳ буд. Баъди муайян намудани шахсияти Дороб Қамар прокурор Асад Ғанӣ ба хизматҳои вай шинос шуда, қариб буд аз додани розигии хеш баҳри ба зери назорат гирифтани ҳамаи намудҳои мукотиботаш худдорӣ намояд, вале ҳамон лаҳзаҳо худи Ҳамид Ҷовид сабуриро аз даст дод…
Асад Ғанӣ, ки чунинашро интизор набуд, аз сухани дўст шикастан гардани шайтон шиканадро ба хотир овард. Ба ҳама даву тозҳои милиса нигоҳ накарда Дороб Қамар, мисли оне ки ба даҳонаш об гирифта бошад, хомўш буду хомўш.
Поёни шаби сиёҳ сафед аст, гуфтагӣ барин, дар ҳоле ки гурўҳи фаврӣ дар дафтари кории сарвари ШКД сари ҳамин масъала баҳс доштанд, касе ба дар ангушт зад.

• Марҳамат.
  Котиба вориди дафтари кории Ҳамид Ҷовид гашта, лифофаеро ба дасти сардор дод.
• Ин чӣ?
• Намедонам, вале шахсе, ки инро овард, дар қабулгоҳ аст.
• Вайро ҷеғ занед!
• Хуб шудааст, - гўён котиба аз дар баромад.
• Шуморо сардор мепурсад, - шуниданд ҳамагон овози котибаро.
• Не, ман даромадан наметавонам, дар лифофа бошад, сабти овози назорати онҳое ҳаст, ки таваҷҷуҳи милисаро бедор намудаанд, - гуфт курер ва дари то кунун кушодаи сардорро аз самти қабулгоҳ пӯшид.
  Ҳамид Ҷовид ҳамин лаҳза хатои хеш фаҳмид. Фаҳмид, ки курер шомили раёсатест, ки кормандонаш бо ному насаби бофта амал мекунанд. Ному насаб ва ҷойи кори аслиашон бошад, дар зери грифи "ОО" (ниҳоят махфӣ нигоҳ дошта мешавад).