Тарабро сад адое дар вуҷудам,
Чу бинам он ниҳоли хушнамудам.
Бувад давлатпаноҳу мӯниси ман,
Ба пойи қоматаш сар дар суҷудам.

---

Моем сафина дар миёни дарё,
Дарёст пурошӯбу карон нопайдо.
Пайдо машав, ай карона, дар чашми замон,
Моно, ки зи ту равем, монӣ танҳо!

---

Сармастаму махмураму дилношодам,
Бе рӯйи ту, ай санам, зи сар озодам!
Озодасарам, ду дида пур аз обам,
Пуроб ду дида, кай кунӣ шодобам?!

---

Пайдо гаҳаму гаҳе чӣ нопайдоям,
Бар ҳусну ҷамоли дилбаре шайдоям.
Аз олами кӯдакӣ чу растам, ба Худо,
Маҷнун нашуда, ман ошиқи Лайлоям!

Гули яктойи ман рӯйи ту бошад,
Дили пазмони ман сӯйи ту бошад!
Ба уммеде ҳазорон гул бибӯям,
Ки шояд дар миён бӯйи ту бошад!

---

Занҳо, ки музореъи бани инсонанд,
Меъмори асосии ҳама айвонанд!
Дар поси муҳаббат зи ману мо боло,
Мардонасифат, мардтар аз мардонанд!

---

Ишқ бе зан бепаноҳ аст,
Ишқ бе зан гарди коҳ аст!
Ишқ бе мард иштибоҳе,
Мард бе зан рӯсиёҳ аст!

---

Дар нӯки забони хома, ки бишкастаст,
Гуфтори адиби мӯътабар пинҳон аст.
Нанвишта агарчи монд, гум менашавад,
Дар батни замини тира зар пинҳон аст!

Нокас нашиносад одаму оламро,
Бӯзина шуморад каси исодамро.
Охир ба балои бад гирифтор шавад,
Гар пири худаш бихонад ӯ Ҳотамро!

---

Садоқат парчами меҳру вафо бод,
Рафоқат ҳамраҳи халқи Худо бод!
Хушунат сарнагун бодо ба гетӣ,
Хусумат мубтало боду фано бод!

---

Басо ганҷе, ки бодовард бошад,
Набошад ганҷ, ранҷу дард бошад!
Адаб омӯзад инсони худогаҳ,
Агар некӯсиришту мард бошад!

---

Туфайлии касон ар нокас омад,
Зи ин дарё ҳазар кун, бо хас омад!
Ҳамебезаш ба парвезан, ки обаш
Ба як хас омаду як хас бас омад!

Амонатро хиёнат маслиҳат нест,
Замонатро амонат маслиҳат ҳаст!
Садоқатро разолат маслиҳат нест,
Разолатро адоват маслиҳат ҳаст!

---

Ғанимат шумар марди равшангуҳар,
Ки тобанда бошад чу нури саҳар!
Варо, то тавонӣ, ба сар тоҷ кун,
Бигардонат ин тоҷ бологузар!

---

Мусаллойи Хуршед ҷӯё шавӣ,
Музофоти мардони доно бирав!
Насимаш наъим асту роҳатфизо,
Биё бе дарангеву бо мо бирав!

---

Ҳар кас, ки қалам ба даст андеша занад,
Ҷаҳде кунаду ба ростӣ пеша занад.
Росихқадам ар бувад, муҳобо нашавад,
Дар боғи биҳишти илму фан реша занад!