Ки Бағдоди туро доди бузург аст,
Самарқанди туро қанди азим аст.
Ҳарисам кард тамъи доди қандат,
Агарчи банда хурсанди азим аст.
Буридастӣ маро аз хешу пайванд,
Ки дилро бо ту пайванди азим аст.
Хамуш кун ҳамчу ишқ, ай зодаи ишқ,
Агарчи гуфт фарзанди азим аст.
Рикоби Шамси Табрезӣ гирифтам,
Ки зини Шамс зарканди азим аст.

Қарори зиндагонӣ он нигор аст,
К-аз ӯ он беқарорӣ барқарор аст.
Маро савдои ту доман гирифтаст,
Ки ин савдо на он савдои ёр аст.
Манам сӯзон дар оташҳои нав-нав
Маро бо ёракон акнун чӣ кор аст?
Ҳаменолад дарун аз беқарорӣ
Бад-он монад, ки он ҷони нигор аст.
Чу аз ёре туро ҷон хаста гардад,
Намедонад, ки андар ҷон-ш хор аст.
Ту дар ҷӯйию хорат мехарошад,
Намедонӣ, ки хоре дар сарор аст.
Гурезон шав аз он хору ба гул рав,
Ки Шамсиддини Табрезӣ баҳор аст.

Табиби дарди бедармон кадом аст?
Рафиқи роҳи бепоён кадом аст?
Агар ақл аст, пас, девонагӣ чист?
В-агар ҷон аст, пас, ҷонон кадом аст?
Чароғи оламафрӯзи мухаллад,
Ки не куфр асту не имон, кадом аст?
Пур аз дурр асту баҳри лоязолӣ
Дарунаш гавҳари инсон кадом аст?

Ғуломона-ст ашёро қабоҳо,
Миёни бандагон султон кадом аст?
Яке ҷузви ҷаҳон худ беғараз нест,
Табиби ишқро дуккон кадом аст?
Хирад оҷиз шуд андар фикри оҷиз,
Ки саркаш кист, саргардон кадом аст?
Бути мавзун ба бутхона басе ҷуст,
Ки мавзунотро мизон кадом аст.
Чӣ қибла кардаӣ ин гуфтугӯро?
Талаб кун, дарси хомӯшон кадом аст?

Туро дар дилбарӣ дасте тамом аст,
Маро дар бедилӣ дарду сақом аст.
Ба ҷуз бо рӯйи хубат ишқбозӣ
Ҳаром асту ҳаром асту ҳаром аст.
Ҳама фонию хони ваҳдати ту
Мудом асту мудом асту мудом аст.
Чу чашми худ бимолам, худ ҷузи ту
Кадом асту кадом асту кадом аст?
Ҷаҳон бар рӯйи ту аз баҳри рӯпӯш
Лисом асту лисом асту лисом аст.
Ба ҳар лаб аз забони ишқ бар мо
Салом асту салом асту салом аст.
Зи ҳар зарра ба гуфти безабонӣ
Паём асту паём асту паём аст.
Ғаму шодии мо дар пеши тахтат
Ғулом асту ғулом асту ғулом аст.
Агарчи уштури ғам ҳаст гаргин,
Имом асту имом асту имом аст.
Паси он уштури шодии пуршир
Хитом асту хитом асту хитом аст.
Туро дар бинии ин ҳар ду уштур
Зимом асту зимом асту зимом аст.
На он шире, ки охир тифли ҷонро
Фитом асту фитом асту фитом аст.