ҚАТРАБОРОН

МЕТАВОН
Метавон озодагиро мояи озарм кард,
Метавон дар гулхани як ханда худро гарм кард.
Аз насими як нигоҳе метавон гул-гул шукуфт,
Метавон аз қатраашке санги дилро нарм кард.

ЗИНДАГӢ
Зиндагӣ ҷанг аст умре дар миёни неку бад,
Зиндагӣ сулҳ аст умре дар миёни хубу дад.
Одамӣ чун тортан баҳри шикори хештан
Метанад тору ба доми хеш рӯзе мефитад.

ФИҒОНИ ДАРАХТ
Фиғон бархост аз ҷони дарахте,
Ки аз неши табар афтод бар пушт.
Ки аз ман бурда буд ӯ дастаашро,
Дареғо, ӯ маро бо дасти ман кушт.

ШАРАФ
Рӯҳам ба ҳама ҷабр ниҳон механдад,
Сар гир зи ман, бубин, ки ҷон механдад.
Мардони шараф чун сари боло доранд,
Шамшер хӯранд, захмашон механдад.

МЕХАЗАД
Чун забон аз коми ӯ ҳар бор берун мехазад,
Аз даҳонаш заҳри шаккарбор берун мехазад.
Дасти худ ҳар гаҳ, ки бинмояд ба сӯи кас дароз,
Даст не, аз остинаш мор берун мехазад.