ХОҶА ОБИ ГАРМ

Хайр, то дидори дигар, Хоҷа Оби Гарм!
Эй замини нусрату фар, Хоҷа Оби Гарм!

Аз ту месабзам дубора чун заранги ту,
Эй замини сабзи бовар, Хоҷа Оби Гарм!

Сӯҳбати ман мешукуфад бо дарахтонат,
Чун гуле дар шохаи тар, Хоҷа Оби Гарм!

Рӯди шаффофу зулолу покрӯӣ ту
Ҳаст бо ман мисли хоҳар, Хоҷа Оби Гарм!

Рез бар дӯшам зулолии сафоятро,
Ҳамчунон аз Оби Кавсар, Хоҷа Оби Гарм!

Зода аз нав мешавам ман дар ту ҳар боре,
Эй ту ҷонбахшо чу модар, Хоҷа Оби Гарм!
22.01.2010

ЧУН ДИЛ БА КАФИ КӮҲ

Афрохта сар ба Каҳкашон аст Айнӣ,
Чун дил ба кафи кӯҳ аён аст Айнӣ.

Ноҳияи фазлу хираду илму адаб,
Ноҳияи шеъру шоирон аст Айнӣ.

Беҳуда набуд номи Айнӣ монданд,
Зеро ки ҳама китобхон аст Айнӣ.

Дарвозаи марзи Рӯдакиву Тӯғрал,
Сарводасарои ҷовидон аст Айнӣ.

Бо Фалғару Фони ӯ сар афрохтаам,
Дар домани нанги осмон аст Айнӣ.

Аз он нафақат рӯди Зарафшон ҷорист,
Дарёи дилу табъи равон аст Айнӣ.

Бо ин ҳама бори санг дар санг ба дӯш