ҒАМХОРӢ

• Во поям, во поям,
  Нолиш кунад бобоям.
  Момо гӯяд: - Во, ҷонам,
  Хам нагардад миёнам.
  Аз нолиши бобоям,
  Аз нолиши момоям,
  Зиқ шудаму хобидам,
  Мисли онҳо нолидам.
  Ҷаст аз ҷояш бобоям,
  Сӯям омад момоям.
  Гуфтанд: - Ҷон фидоят,
  Дард мекунад куҷоят?
  Ба мо занад балоят,
  Ҳозир ёбем давоят.
  Зуд овард аз бароям
  Ҷою асал бобоям.
  Момоҷонам дав-давон
  Овард шири ҷӯшон.
  Хеста тоқӣ пӯшидам,
  Асалҷойро нӯшидам.
  Табассум бобоям кард,
  Табассум момоям кард.
  Гирифтандам ба оғӯш,
  Дардашон шуд фаромӯш.