ФАТҲИ ХУҶАНД

Пас аз мағлубияти Бухоро ва Самарқанд гурӯҳи сершумори аскарони муғул сӯи Хуҷанд ба ёрии Чағатой омаданд, ки ӯ шаҳри Банокатро фатҳ намуда, қалъаи Хуҷандро муҳосира карда буд. Ба мудофиаи шаҳр Темурмалик — яке аз ҳокимон ва сарлашкарони Муҳаммад Хоразмшоҳ сарварӣ менамуд, сафи лашкари муғул аз расидани ёрӣ дучанд афзуда, ҳимояи қалъаи Хуҷанд душвор гардид ва дифоъкунандагон маҷбур шуданд, ки онро тарк намоянд.

ТЕМУРМАЛИК ЧӢ ГУНА
ҚАҲРАМОНИ НИШОН ДОД?

Темурмалик ба истилогарон муқобилати сахт нишон дода, ба ҷазирае рӯ овард, ки дар миёнаҷои дарёи Сир воқеъ буд. Ӯ дар ин мавқеи барои душман дастнорас истеҳком гирифта, киштиҳои ҷангӣ сохт ва рӯи онҳоро бо намад пӯшонида, бо гил андова намуд. Темурмалик шабона бо киштиҳояш сӯи соҳил ҳамла оварда, лашкари душманро ғофилгир ва нобуд мекард. Муғулҳо барои фатҳи сангари Темурмалик дар канори дарёи Сир садди сангине сохта, мехостанд ҷазираро фатҳ намоянд. Темурмалик ночор паноҳгоҳашро тарк карда, бо сипоҳиёни киштисавораш дар самти маҷрои дарё ба пеш ҳаракат намуд. Муғулҳо барои боздоштани Темурмалик дар тангнои ду соҳил занҷир кашиданд, аммо ӯ занҷирро пора карда, аз муҳосира раҳо ёфт.