ДИЛИ БУЗУРГ

Дарид пардаи шаб чун саҳар нафас бигрифт,
Шафақ ба домани гардуни нилгун афтод.
Насими рўҳафзо омад аз табассуми субҳ,
Ба кўҳу дашту даман рангҳо фузун афтод.

Зи нури шамс ҳарорат давид дар дили рўз,
Ки аз хумори шабон буд хаставу лоғар.
Ба ҷилва омада боғи чаман зи мусиқор,
Табиат аз нахи зар карда пираҳан дар бар.

Нишастгоҳи ман аст баски домани хуршед,
Дил аз фараҳ зи нишоти назора шуд шодоб,
Сипеҳр чеҳра барафрўхт, абри найсон рехт
Ба сўи сабзаву гулҳо ҳазор гуна гулоб.

Зи қалби санг ба ҳар сў фавора меборид,
Ба рўи майса ҷилодор чашмаҳои булўр.
Зи печутоб ба ҳам хўрда, гашта дарёе
Зи байни кўҳ равон бо талотуму бо шўр.

Дар ин пагоҳи баҳорон ба кишвари тоҷик
Ба чашми ман нигарӣ, ҳаст дар ҷаҳон якто,
Ба шеър сурати ўро кашида бахшидам
Ба дўстам, ки дилам карда дар дилаш маъво.

Дили бузурги туро, дўст, медиҳам ташбеҳ
Ба чашмаҳои мусаффои Тоҷикистонам,
Ба рўдҳои зарафшони пурхурўши ў,
Ба ГЭС-ҳои тавонои шўълаафшонам.

Ба сони қуллаи Помир бузург вақти сукут,
Ба сони баҳри дамонам ба ҷўш вақти шитоб.
Ба ҳеҷ қувва наҷунбад ба қадри як сари мў,
Ба авҷи мавҷ бувад доимо, на дар ғарқоб.