ДАР БАҒАЛ ДОРАМ

Амиқандешаам, з-он гавҳару кон дар бағал дорам,
Муҳаббатпешаам, лаъли Бадахшон дар бағал дорам.

Зи қайди ғайр озодам, зи ёди дўст дилшодам,
Дили ошуфтае аз ишқу ҷонон дар бағал дорам.

Ситоиш мекунам дилҳои ноорому беғашро,
Аз ин рў чашмаҳои меҳри ёрон дар бағал дорам.

Муҳити ишқро аз синасофиҳо садаф гаштам,
Дури рахшандаи завқи дилу ҷон дар бағал дорам.

Машоми дўст то бошад муаттар чун саҳаргоҳон,
Гулистонам, насими навбаҳорон дар бағал дорам.

Дури макнуни асрор аст андар синаам махзан,
Дили ганҷинаи ашъору ирфон дар бағал дорам.

Баҳорон ҷилварези ранг мебошад хаёли ман,
Ки аз ҳар сў навои андалебон дар бағал дорам.

Нигористони шеърам, гулшани эҷоди маъниям,
Баҳористони шавқам, сад дабистон дар бағал дорам.

Фурўғи анҷуманорои ёрон будаам умре,
Агар донанд, ман шамъи шабистон дар бағал дорам.