БАҲОРИ ГУЗАРОН

Навбаҳори навҷавонӣ бигзарад,
Гулфишони зиндагонӣ бигзарад.
Аз баду неки ҷаҳон огоҳ бош,
Неку бад ҳам ногаҳонӣ бигзарад.

Меҳрварзии ҷавонӣ хуш бувад,
Чун хаёли осмонӣ хуш бувад.
Ишқро дар ҳастии худ зинда дор,
Талҳу ширин комронӣ бигзарад.

Дар ҷавонӣ гул бичину гул бибӯй,
Бо ҳама дилҷӯии худ дил биҷӯй!
Нозбӯ дар банди гесӯ зан, ки зуд
Нозҳову дилситонӣ бигзарад.

Дар умеди худ бисабзон боғи дил,
То намонад аз ҷавонӣ доғи дил.
Орзуи ишқи аввал чун насим
Аз раҳи дил ормонӣ бигзарад...