---

Иттиҳоди қавм душманро шикаст овардан аст,
Хиштҳо якҷоя бардоранд бори хонаро.

---

Гарчи барф аз сардҳарфӣ бо ҷаҳон бедод кард,
Ҳарфҳои гарми оташ хотири мо шод кард.

---

Хонаи занбӯрро монад дили марди сухан,
Аз асал пур кардаанд азбаски ин ғалберро.

---

Об аз боло чун афтад, кӯҳ пурғавғо кунад,
Ҳар кӣ аз мансаб фарояд, оҳу вовайло кунад.

---

Бар сахои нокасон дигар чӣ сон бандам умед,
Ғайри ангуштон кафамро пур намесозад касе.

---

Тез мегардад ба ҷарсанги бало теғи забон,
Сангандозон ба мо лутфу мурувват мекунанд.

---

Дар танӯри сина пухтам сатрҳои хомро,
Чун хамири норасе шеърам чаро гул мезанад?

---

Рӯзгори танг моро ҳеҷ ҷое ҷо надод,
Хирачашмиҳои чевар риштаро бехона кард.

---

Гар дили оина набвад, тира бошад бахти кас,
То нагирад чанг сурат, шишабандаш мекунанд.

---

Офтоб аз офтобӣ буданаш зебо шавад,
Одам аз одамгарӣ афзуданаш зебо шавад.

---

Нуқсҳои марди комил аз ҷавон афзунтар аст,
Доғҳои моҳи пурра бештар гардад аён.

---

Сахт шуд аз зарбаҳои зиндагӣ сутхони ман,
Лой, ки хелида шуд, девор мустаҳкам шавад.