---

Чу ғалберат кушодан чашм бояд, то тавон дидан,
Паси гарду ғубори зиндагӣ ризқи ту пинҳон аст.

---

Гузашта чун ҳубоби рӯи дарё маҳв мегардад,
Ман он мавҷам, ки дарёро равони тоза мебахшам.

---

Агарчи назди ту моро сияҳ гуфтанд, боке нест,
Аз он шодам, ки ҳамрангам ба чашмони сиёҳи ту.

---

Назири реша дар олам зи худ бигзашта марде ку,
Ки аз баҳри ҳаёти нахл худро мекунад дар хок.

---

Ту мепурсӣ, ки чун дарди суханро мекашад шоир,
Забони оташам, печида дар худ меравам боло.

---

Зи сар бар санг кӯбишҳои дарё панд бигрифтам,
Ки ҳар соҳибдиле дар зиндагӣ саркӯб мегардад.

---

Лагадкӯб аст зери пои дарё санги вазнине,
Савори мавҷ мебинам ҳубобе, ки сабукбор аст.

---

Худшиносӣ мекунад рӯшан ҷаҳони мардро,
Ҷавҳари оина рӯшан мекунад оинаро.

---

Бакси чун дарё фарозу шебҳо паймудаам,
Пои дил дар роҳи ноҳамвор шуд пуробила.

---

Дар ҷавонӣ хуни ман монанди дарё ҷӯш дошт,
Вақти пирӣ з-он такопӯ монд кафк андар сарам.

---

Курчаки ёдам гирифта дар шаби танҳоиям
Тоза созам барфи боми кулбаи бобоиям.

---

Раҳзани чашми сиёҳат мекунад дилро шикор,
Мекунанд, оре, шаби торик дуздон раҳзанӣ.