---

Беш бар боло париданҳо нишони ғафлат аст,
Тир даҳчанде равад боло, ба зарб ояд нишеб.

---

Ханда бемаврид кардан боиси сад кулфат аст,
Мезанад сармо гули барвақт лаб во кардаро.

---

Аҳли илму фазлро як такягаҳ бошад зарур,
Нахл чун пурбор бошад, поя бар он мезананд.

---

То расад бар воя фарзанде, падар заҳмат кашад,
Чун занад тире камон, аз пушт зарбат оядаш.

---

Гарчи ҳар пайванд аз пайванд мегардад ҷудо,
Ман ки пайвандӣ наям, аз реша кардандам ҷудо.

---

Кӯтаҳии умри мардони хирад беҳуда нест,
Меваҳои пухта меафтанд зуд аз шохаҳо.

---

Як сухан беҷо бияфтад, фитна барпо мешавад,
Бод бар оташ бияфтад, шуъла боло мешавад.

---

Дар биёбони ҳавасҳо то куҷо раҳ мебарам,
Нест ғайри абр дигар соябоне бар сарам.

---

Бо дили санги туам азбаски кор афтодааст,
Достони ишқи худ дар санг ҳаккокӣ кунам.

---

Бар арӯси шеър аз маънӣ қабо меофарам,
Чун карам печидааст аз баргҳо шеъри тарам.

---

Ҳосили пайванди дилҳо ҳаст шаҳди зиндагӣ,
Мева ширин аст, оре, шохаи пайвандро.

---

Рангу рӯи гандумиам буд, ки рӯзе бештар
Зиндагӣ монанди санги осиё гардам кунад.