---

Оташи сӯзи фироқат сӯхт банду банди мо,
Сина шуд охир кабобу дида обаш мезанад.

---

Ҳар киро болои сар ман ҷой додам мисли тоҷ,
Носипосӣ карду чун тугма гиребонгир шуд.

---

Лахчаи сӯзон шуд аз ишқи шарарборат дилам,
Дуд карда оқибат як рӯз кӯрат мекунад.

---

Шамъаму дар базми бедардон бисӯзам то ба рӯз,
Домани хушки маро ашки алам тар мекунад.

---

Шоире, к-аз шеър гуфтан монд, имдодаш кунанд,
Чашмае, к-аз ҷӯш монад, тоза бунёдаш кунанд.

---

Кас надонад ҷои худ дар зиндагӣ расво шавад,
Гул агар дар дида афтад, чашм нобино шавад.

---

Печутоби зиндагӣ дилро тавоне медиҳад,
Риштаи нотофта ҳаргиз надорад қуввате.

---

Қад кашиданҳо ба боло медиҳад гоҳе фиреб,
Пилта чун боло бисӯзад, шиша мегардад сиёҳ.

---

Ханда кун, ҷоно, ки аз ҷон дӯстдори хандаам,
То нашуд дар ханда гул, мақбули хушдоре нашуд.

---

Хостам дар шаҳри Қӯрғон сарпанаҳ пайдо кунам,
Сарпанаҳ ин ҷо ба ҷуз тоқӣ дигар пайдо нашуд.

---

Содалавҳон сода мегӯянд шеърамро, вале
Сода шеърам аз барои мардумони сода аст.

---

Гарчи шафқатро надидам дар нигоҳи мардумон,
Гоҳи ғам бар ҳоли зорам мардуми чашмам гирист.