---

Аз ғубори зиндагонӣ тира шуд хотир маро,
Мешавад тасвир дар оина аз зангор паст.

---

Ҳалқа созад дасти худ бар гардани дилдор ёр,
Ҳалқа ман, дуди сигор аз бенигорӣ мекунам.

---

Дар тарозуи хирад з-он мекашам вазни сухан,
Ман гуҳар аз кони дил бо нӯги мижгон кандаам.

---

Чашмони нилранги ту чун осмон ба шаб,
Дар осмони чашми ту ман як ситораам.

---

Аз дидаи адиб куҷо шуд ниҳона чиз,
Ғалбервор чашм зи сар то ба пост ӯ.

---

Гардун гулӯлажола аз он мезанад, ки мо
Дар сангари хиёнати файзаш нишастаем.

---

Кардам сафар ба роҳи ҳақиқатпарастҳо,
Аз корвони рафтаи андешаҳо мапурс.

---

Шояд замини ишқи ту будаст шӯразор,
К-аз донаи умеди дилам майсае наруст.

---

Таънам чӣ мезанӣ, ки садоят баланд нест,
Дар пардаҳои ашк ниҳон аст сози мо.

---

Аз оби ғусса хӯрдану ташвиши рӯзгор
Оинаи хаёл чӣ зангорҳо гирифт.

---

Чун шишаи чароғ манам ҳамнишини нур,
Аз санги дасти зиндагии сахт пораам.

---

Меҳру шафқат ҷой гирад дар дили нарм,
Дар замини нарм рӯяд дона беҳтар.