---

Модаронро чун гули маҳ тоҷи сар бояд намуд,
Навниҳолон донаро бар фарқи сар бардоштанд.

---

Нармдил будан калиди ганҷҳои неъмат аст,
Чун замин шудгор бошад, ҳосил афзун мешавад.

---

Нест бе ёрони ҷонӣ лаззати умри азиз,
Чун бишуд ширу шакар як ҷо, бигирад лаззате.

---

Аз тиҳимағзон умеди такягаҳ кардан хатост,
Мефитад болори хона, поя гар пӯсидааст.

---

Панҷа бар мӯи сари худ мезанам бо ёди шеър,
Чоҳ кандан боиси пайдоиши об аст, об.

---

Хоҳамат бошӣ ба ман пайваст дар роҳи ҳаёт,
То нашуд пайваст ду ноқил, аланга барнахост.

---

Ҳар касе ки хор медорад забонро, нокас аст,
Тӯтиро аз зоғ қадраш дар сухангӯӣ бувад.

---

Аз шукуфти чашми бодомии ту кардам гумон:
Бармаҳал гул кард шохи орзуҳои дилам.

---

Мӯи сар гаштан сафед ин нест аз камқувватӣ,
Кӯҳ то барфаш набошад, нест дарёи дамон.

---

Нуқси андак беш тобад бар тани соҳибҳунар,
Чун либос озода бошад, тез гирад доғро.

---

Дӯст бар имдоди ёри хеш бояд ки расад,
Дасти чап гар суст ҷунбад, рост ислоҳаш кунад.

---

Бе муҳаббат қавмро сарҷамъ кардан мушкил аст,
Дарзае ки бигсалад бандаш, парешон мешавад.