---

Парда бисёр аст дар савдо, Пардаи шарму ҳаё кам шуд.

---

Гар наҷунбӣ, мешавӣ бемор, Оҳани бекор бандад занг.

---

Чанги уққобӣ надорӣ, Лошахӯр шав ҳамчу каргас.

---

Шамъи хомӯши ҳавасҳои дилам Даргирифт аз оташи чашмони ту.

---

Аз қалам омӯз чашми корро, Дар адои кор бо сар медавад.

---

Рӯшноӣ дар дили бесӯз нест, Офтоб ар ки насӯзад, рӯз нест.

---

Гарм гардад ошёни сарди дил Аз нигоҳи гарми фарзандони ман.

---

Аз бахилӣ чархи пири кӯжпушт, Кӯжпуштам мекунад монанди худ.

---

Аз ҷазо марди сияҳдил мераҳад, Соя хушк аз об берун мешавад.

---

Достони ишқи ман дар чашми туст, Сафҳае нохондаам, онро мапӯш.

---

Шоир андар шоми тори зиндагӣ Моҳи маҳбусест дар зиндони абр.

---

Пешае аз худнамоӣ нест бад, Умри гул аз худнамоӣ кӯтаҳ аст.

---

Соҳиби пул меравад мошинсавор,
Мо ба боли орзу пар мезанем.

---

Ҳар ҳамоғӯше набошад безиён,
Зардпечак мекунад гулро хазон.

---

Осмони нилгун чашми ту аст,
Чун ситора ҷой дар чашмат шавам.

---

Каҷ агар гуфтам, набошад айби ман,
З-он ки бошад чархи каҷрафтор каҷ.

---

То кушояд пеши кори мову ту,
Ҳамчу ман пешона бикшову биё.

---

Сар заданро ҳаст фарқ аз сар задан,
Об ҳам аз соҳилаш сар мезанад.

---

Гуфтамаш: кони лабат дорад намак,
Гуфт: агар бошад чунин, онро намак.

---

Офтобо, ошиқӣ монанди ман,
Ки чу ошиқ бинамат бо ранги зард.

---

Мешавад аз лутф ҳосил муддао,
Майса аз борон кунад нашъунамо.

---

Осиёби марг чархад рӯзу шаб,
Ҳамчу дон дар навбати дӯлем мо.

---

Ту магӯ, ки асмарам ман, асмарам,
Он шабам, ки рӯзи дан меоварам.

---

Мо наметарсем аз борони ашк,
Менишонад ашк гарди дардро.