ФАРДҲО

Талотумҳои зери баҳрро гирдоб медонад.

---

Чароғи рӯшанеро боди дайду мекунад хомӯш.

---

Ғубор аз осмон охир ба рӯи хок меафтад.

---

Гиряи тифл оғози марг аст.

---

Лой монад зи оби лойолуд.

---

Тирагӣ субҳ дар бағал дорад.

---

Шаби зулмот беҳтар аз сияҳрӯӣ.

---

Чу гул хандида бояд мурд.

---

Пӯфаки холӣ ба боло меравад.

---

Дар ширинӣ мешавад пайдо магас.

---

Аррае дандон надорад, оҳани бекора аст.

---

Ман он дудам, ки дорам мужда аз оташ.

---

Савти ғамолуда дорад пардаи шаб.

---

Поёни сияҳкории шаб рӯи сиёҳ аст.

---

Зарбаҳои Кӯҳканро кӯҳ медонад, ки чист.

---

Шамъ механдад ба ҳоли ашкҳои доманаш.

---

Нардбони зиндагӣ дорад дусад монеачӯб.

---

Обро, ки лой бошад, такнишинаш мекунанд.

---

Чун ду каф якҷоя гардад, мешавад дасти дуо.

---

Хирачашмиҳои чевар риштаро бехона кард.

---

Он садафро дӯст дорам, к-андарунаш гавҳар аст.

---

Баёзи пириам аз шӯрбахтиҳои даврон аст.

---

Дуд аз оташ ҷудо гардад, вафобегона аст.

---

Он сиёҳиам, ки сад девону дафтар бо ман аст.

---

Рақсҳои гарми оташ дегро девона кард.