ХОКИ ВАТАН

Аз ҳади хоки ватан рафта бурун,
Ранҷаи заҳри ҷудоию фироқ,
Ҳар куҷо ҳамватане ҳаст маро
Сокини Кобулу Табрезу Ироқ.

Сари роҳ дар сафари кишвари ғайр
Дӯш бо ҳамватане биншастам.
Иштиёқи ватан ӯро месӯхт,
Соате гӯш ба ҳарфаш бастам.

Сарвату давлати афзунаш буд,
Манзилу маскани ободе дошт.
Беватан буд вале марди ғариб,
Айши талху дили ношоде дошт.

Хондам аз ҳикмати Саъдӣ байте,
Чун ба ҳолаш, ки мувофиқ, буд он:
«Пой дар занҷир пеши дӯстон,
Беҳ, ки бо бегонагон дар бӯстон»

Ашк аз дида чу марҷон мерехт,
Зор менолиду мегуфт «Ватан»
Илтиҷо дошт зи ман марди ғариб
Як каф аз хоки ватан - атри кафан.

Аз ҳади хоки ватан рафта бурун,
Ранҷаи заҳри ҷудоию фироқ,
Ҳар куҷо ҳамватане ҳаст маро
Сокини Кобулу Табрезу Ироқ.