---

Гардун, чу ба сӯи мардум андохт каманд,
Овард басо сари баланде дар банд,
Ҳар мард чу Рӯдакӣ ба домаш н-афтод,
Ин гург ду чашми равшани ӯро канд.

---

Дар хилвати рози мо наё, эй бадхӯ,
Гар омадаӣ аз дили худ кина бишӯ,
Сози ғаразу кинакашӣ барҳам зан,
Чун зоғ ту аз меваи мо кирм маҷӯ.

---

Эй бахт, маро ранҷ мадеҳ бо афсун,
Чун хома ба дар даст макун хору забун.
Ҳар он чй дилат хост раво дор, вале
Дар қабзаи нокасон маро зоча макун.

---

Чун рӯд ман аз баландиҳо паст шудам,
Чун боди сабо поку тиҳидаст шудам.
Лек иззати худ нарехтам пеши касе,
Бо шавқати сарбаландиҳо маст шудам.

---

Дар маҳфили ҷумла пухтагон мо хомем,
Бо росдилии хештан нокомем.
Аз чарбзабонӣ рӯи шум овардем,
Чун оинае ба пеши зиштандомем.

---

Ҳар ҷо, ки ту рафтӣ дар канорат будам,
Бе ваъда сари раҳ, интизорат будам,
Нохонда ба сад баҳона дар хонаи ту,
Ҳар рӯз зи бахт умедворат будам.

---

Аз гуфтаи худ наям парешон, эй дӯст,
Аз кардаи худ наям, пушаймон,эй дӯст.
Ман хӯшаи донарез гаштам акнун,
Аз оташам ин қадар матарсон,эй дуст.