Тамоми сокинони ҷумҳурии азизамон чеҳраи нуронии ин Роҳбари ҷавони кишварро бори аввал дида бошанд ҳам, бо Барномаи наҷотбахш он касро ба самимияти бузург пазируфтанд ва аз дилу ҷон дӯст доштанд. Симои нуронӣ, костюми сафед ва дилу ботини поки Сардори давлатамон ба ҳамаи хурду калони мардуми азияткашидаамон мақбулу писандида ва азизу меҳрубон гардиданд.

Бо ҳидоятҳои хирадмандона ва дурандешии Раиси Шӯрои Олии Ҷумҳурии Тоҷикистон, Сардори давлат муҳтарам Эмомалӣ Раҳмон роҳи ниҳоят душвори ваҳдату ҳамдилӣ, бародарию ҳамбастагӣ қадам ба қадам паймуда шуд. Хусусан аз тарафи Шӯрои Олии ҷумҳурӣ 26 ноябри соли 1992 Рӯзи сулҳ ва ризояти миллии халқи Тоҷикистон эълон гардид, ки ин воқеаи хеле хурсандибахши ҳаёти сиёсию ҷамъиятии кишвар мебошад.

Дар ин бобат рӯзномаи «Садои мардум» чунин менигорад:

«Рӯзи сулҳ ва ризояти миллӣ

Шӯрои Олии ҷумҳурӣ 26 ноябрро Рӯзи сулҳ ва ризояти миллии халқи Тоҷикистон эълон намуд. Аз фазли раҳмати Офаридгор густурда шудани дастархони оштии миллати тоҷикро бар тамоми сокинони Ватан самимона табрик мегӯем. Ба хонадони 5000-солаи тоҷикон офтоби ҷонбахши сулҳу амонӣ шуълафишонӣ менамояд, аз ҷомеи деҳу барзан ва дашту даман нидоҳои иттиходу иттифоқ меоянд!»

РИСОЛАТИ БЕНАЗИРИ ТАЪРИХӢ

Баъди атои Худо гардидани Истиқлолияти давлатии Ҷумҳурии Тоҷикистони маҳбуб эҳёи нақби Анзоб нахустин сохтмоне буд, ки бо ҷаҳду талош ва кӯшишҳои шахсии Ҷаноби Олӣ, Президенти мамлакат, Пешвои муаззами миллат муҳтарам Эмомалӣ Раҳмон оғоз шуд.