Мафҳуми номуайяни чунин маъно дорад, ки муҳокимаи мазкур ё ҳақ ва ё ин ки дурӯғ мебошад.

Агар ба мо дурӯғ будани муҳокимаи E ва ё ҳақ будани муҳокимаи i маълум бошад ҳам, ба воситаи мантиқ ҳақ ва ё дурӯғ будани муҳокимаи А ва муҳокимаи O-ро муқаррар карда наметавонем, чунки дар ин вақт мувофиқи мавриди якум муҳокимаи А ҳақ (муҳокимаи O дурӯғ) мешавад, мувофиқи мавриди сейум муҳокимаи А дурӯғ (муҳокимаи O ҳақ) мешавад. Пас, мавридиҳои якум ва сейумро якҷоя карда, мавриди дуюми номуайяниро пайдо мекунем. Ин гуна мавриди номуайяниро бо расми зерини нишон медиҳем:

Мавридиҳои дар боло дидашударо ба назар гирифта, дар бораи муҳокимаҳои мазмунашон якхелаю шаклашон гуногун ба тарзи мухтасар хулосаҳои зеринро баровардан мумкин аст:

1. Агар ҳақ будани муҳокимаи А маълум бошад, он гоҳ муҳокимаи i ҳақ, муҳокимаи E дурӯғ ва O дурӯғ мешавад.

2. Агар дурӯғ будани муҳокимаи А маълум бошад, он гоҳ муҳокимаи O ҳақ, муҳокимаи E ва муҳокимаи i номуайян (яъне ё ҳақ, ё дурӯғ) мемонад.

3. Агар ҳақ будани муҳокимаи E маълум бошад, он гоҳ муҳокимаи O ҳақ, муҳокимаи А ва муҳокимаи i дурӯғ мешавад.

4. Агар дурӯғ будани муҳокимаи E маълум бошад, он гоҳ муҳокимаи i ҳақ, муҳокимаи А ва муҳокимаи O номуайяни мемонанд.

5. Агар ҳақ будани муҳокимаи i маълум бошад, он гоҳ муҳокимаи E дурӯғ, муҳокимаи А ва муҳокимаи O номуайян мемонад.

6. Агар дурӯғ будани муҳокимаи i маълум бошад, он гоҳ муҳокимаи E ва муҳокимаи O ҳақ ва муҳокимаи А дурӯғ мешавад.

7. Агар ҳақ будани муҳокимаи O маълум бошад, он гоҳ муҳокимаи А дурӯғ, муҳокимаи E ва муҳокимаи i номуайян мемонад.

8. Агар дурӯғ будани муҳокимаи O маълум бошад, он гоҳ муҳокимаи А ва муҳокимаи i ҳақ ва муҳокимаи E дурӯғ мешавад.

Чунинанд муносибатҳои муҳокимаҳои мазмунашон якхела ва шаклашон гуногун. Донистани муносибати байни муҳокимаҳо барои аз фикрҳо дуруст хулоса баровардан ва фикрҳои ҳақро аз фикрҳои дурӯғ ҷудо карда тавонистан аҳамияти калон дорад.