Хатари левериҷ (хатар ё таваккали молиявӣ) — имконияти гирифтор шудан ба вобастагӣ аз қарзҳо дар сурати норасоии воситаҳои баргардондани қарз, хатари аз даст додани ликвиднокӣ/устувории молиявӣ мебошад.

7.4. Мафҳуми ҳадди даромаднокӣ ва аҳамияти он барои корхона

Ҳар корхона дар фаъолияти тиҷоратии худ кӯшиш мекунад, ки фоидаи бештар гираду хароҷоташро камтар кунад. Барои фоидаовар шудани ташкилот фаъолияти он бояд даромаднок бошад, яъне маблағи аз фурӯши маҳсулоти корхона бадастомада бояд хароҷоти онро пӯшонад.

Ҳисобкунии нишондиҳандаҳои ҳадди даромаднокӣ ва захираи устувории молиявӣ ба роҳбарияти ташкилот фаҳмиш медиҳад, ки кадом ҳаҷми маҳсулотро тавлид бояд карду фурӯхт, то ташкилот ба «сифр» барояд, яъне ҳама хароҷоти худро пӯшонад. Баъдан, дар асоси ин маълумоти ҳисобӣ, роҳбарияти корхона метавонад истеҳсоли маҳсулот ва нархи фурӯшро чунон ба нақша гирад, ки фоидаи таҳминкардаашро ба даст орад. Захираи устувории молиявӣ барои арзёбии то кадом андоза аз ҳадди даромаднокӣ ба минтақаи фоиданокӣ рафтани корхона имкон медиҳад. Ҳар қадар захираи устуворӣ бузургтар бошад, ҳамон андоза корхона ба падидаҳои гуногуни ногувори иқтисодӣ омодатар аст. Дар сурати ягон воқеаи ғайричашмдошт дар фаъолияти ташкилот, корхона имкони дар минтақаи фоида монданро дорад; ё агар ташкилот наздик ба минтақаи зарару захираи устувориаш хурдтар мебуд, зарари бештар аз ин медид.

Ҳадди даромаднокӣ (нуқтаи безарарӣ, нуқтаи буҳронӣ, ҳаҷми буҳронии истеҳсол (фурӯш)) — чунин ҳаҷми фурӯши корхона аст, ки ҳангоми он маблағи аз фурӯш бадастомада ҳама хароҷоти истеҳсолу фурӯши маҳсулотро ба пуррагӣ мепӯшонад. Барои муайян намудани ин нуқта сарфи назар аз усули истифодашаванда, пеш аз ҳама, хароҷоти мавриди пешгӯиро ба хароҷоти доимӣ ва тағйирёбанда тақсим бояд кард.

Фоидаи амалӣ аз тақсими хароҷот ба доимӣ ва тағйирёбанда (хароҷоти омехтаро сарфи назар кардан ё мутаносибан ба хароҷоти доимию тағйирёбанда ҷумла намудан мумкин аст) аз ин иборат аст: