БАҒДОДИ ДИЛ...

Ҳадиси чашми ту, эй дилфигор, хоҳам гуфт,
Ду-се тарона зи фасли хумор хоҳам гуфт.

Пиёда мекунам аз асп шоирони ҷаҳон,
Даме ки васфи ту, эй шахсувор, хоҳам гуфт.

Чу мерасӣ, ҳама ҷо ғарқ мешавад дар гул,
Туро барои дили худ баҳор хоҳам гуфт.

Зи баски хун бичакад аз нигоҳи ман ҳар дам,
Нишони манзили худ лолазор хоҳам гуфт.

Дар ин чакома, ки "Бағдоди дил" бувад номаш,
Чу Шаҳрзод туро Шаҳрёр хоҳам гуфт.