Дар ҳамин моддаи қонун ҳуқуқи шаҳрвандон ба арзу шикоят нисбат ба амал ё беамалии кормандони мақомоти давлатии шуғли аҳолӣ ба мақомоти болоии он, инчунин ба суд, бо тартибе, ки қонунгузории Ҷумҳурии Тоҷикистон муқаррар намудааст, пешбинӣ гардидааст.

6.2. Асосҳои ҳуқуқӣ ва ташкилии бокортаъминсозии аҳолӣ дар Ҷумҳурии Тоҷикистон

Зери мафҳуми бокортаъминсозӣ низоми ташкилӣ, иқтисодӣ ва ҳуқуқие фаҳмида мешавад, ки барои таъмини шуғли аҳолӣ нигаронида шудааст.

Бокортаъминсозӣ роҳи муҳимтарини мусоидат ба шуғл ва яке аз воситаҳои самарабахши сиёсати шуғл мебошад. Адабиёти илмӣ фаҳмиши васеъ ва маҳдуди ин падидаи ҳуқуқиро пешниҳод мекунад. Ҳамин тавр, ба маънои васеъ, бокортаъминсозӣ тамоми шаклҳои шуғлеро, ки хилофи қонун нестанд, дар бар мегирад, аз ҷумла худиштиголӣ, бахусус фаъолияти меҳнатии инфиродӣ, соҳибкорӣ ва ғайра. Ҳамин тавр, мафҳуми таҳлилшуда ҳам мусоидат барои дарёфти имкони кор кардан ва ҳам худи ҷараёни фаъолияти меҳнатӣ (истифодаи меҳнат)-ро дар бар мегирад. Охирин метавонад тамоми ҷанбаҳои муносибатҳои ҳуқуқии меҳнат (кор дар асоси шартномаи меҳнатӣ), инчунин кор дар асоси шартномаҳои ҳуқуқи гражданӣро фаро гирад. Аксар вақт, ба бокортаъминкунӣ ҳама равандҳои қабл аз бастани шартномаи меҳнатӣ ба назар гирифта мешаванд, аз ҷумла ҷустуҷӯи мустакилонаи