аз шумораи муқаррарии вақти корӣ зиёд набошад (миқдори умумии соатҳои кории корманд ба ҳисоби миёна дар давраи ҳисоботӣ). Зимнан, давомнокии вақти кории ҳаррӯза ё ҳафтаина тибқи ҷадвал метавонанд ба ҳадди муайян аз давомнокии муқаррарии рӯзи корӣ ва ҳафтаи корӣ фарқ кунанд.

Норасоӣ ва ё барзиёдии соатҳои корӣ мутаносибан дар доираи давраи ҳисоботӣ (моҳ, семоҳа ва ғ.) тавре зам ё тарҳ карда мешаванд, ки дар маҷмӯъ соатҳои корӣ ба меъёри соатҳои давраи ҳисоботии дахлдор баробар бошанд. Кори барзиёд аз миқдори муқаррарии соатҳои корӣ дар давраи ҳисоботӣ изофакорӣ мебошад, ки бо музди зиёд ё мувофиқи дархости корманд бо додани вақти истироҳати иловагӣ ҷуброн карда мешавад.

Вақти корӣ дар варақаҳои (табели) баҳисобгирии вақти кории намунааш тасдиқшуда қайд карда мешавад. Варақаи баҳисобгирии вақти корӣ дар як нусха аз ҷониби шахси ваколатдор тартиб дода шуда, бо имзои роҳбари воҳиди сохторӣ ва корманди хадамоти кадрҳо барои ҳисоб кардани музди меҳнат ба муҳосиботи ташкилот пешниҳод карда мешавад.

САВОЛҲОИ САНҶИШӢ

1. Мафҳуми вақти корӣ чист?
2. Вақти корӣ ба кадом намудҳо тақсим мешавад?
3. Вақти корӣ дар корҳои берун аз меъёрҳои муқарраршуда чигуна аст?
4. Реҷаи вақти корӣ чист?
5. Кадом намудҳои реҷаи корӣ мавҷуд аст?