Кафолатҳои давлатии музди меҳнат, ки дар моддаи 141 КМ ҶТ муқаррар шудаанд, дар моддаҳои дигари ҳамин Кодекс ба таври илова ифода ёфтаанд. Кафолатҳои асосии давлатии музди меҳнат дар банди 13.2-и ҳамин боби китоб баррасӣ мегарданд.

Бо рушди иқтисодиёти бозоргонӣ дар Тоҷикистон нақши танзими музди меҳнат дар ҳама сатҳҳои шарикии иҷтимоӣ меафзояд. Корфармо дорои низоми музди меҳнат мебошад, ки он тибқи қонунгузории меҳнат ва дигар санадҳои дорои меъёрии ҳуқуқи меҳнат бо шартномаҳо, созишномаҳо ва қоидаҳои дохилӣ муқаррар карда шудаанд. Бо ёрии шартномаи коллективӣ, созишномаҳо ё қоидаҳои дохилӣ як қатор масъалаҳо дар соҳаи музди меҳнат муайян карда мешаванд. Дар бисёр моддаҳои КМ ҶТ шартномаи коллективӣ ва санади меъёрии локалӣ ҳамчун "усули танзими муносиб" нишон дода шудаанд.
Сабаб ин аст, ки ҳам шартномаҳои коллективӣ ва ҳам танзими локалии муносибатҳои меҳнатӣ аз ваколатҳои корфармо асос меёбанд, гарчанде ки дар амал афзалият ба шартномаи коллективӣ дода мешавад. КМ ҶТ тавсия медиҳад, ки дар шартномаи коллективӣ шаклҳо, низом ва андозаи музди кор, пардохти ҷубронпулӣ, механизми танзими музди меҳнат бо назардошти болоравии нархҳо ва сатҳи таваррум, муқаррар карда шавад.

Кодекси меҳнати амалкунандаи ҶТ иштироки комиссияҳои сеҷонибаро ҳамчун мақомоти шарикии иҷтимоӣ дар ҳалли масъалаҳои музди меҳнат пешбинӣ менамояд.