Дар Эъломияи ТБМ (1944) принсипҳои "кор мол нест", "музди баробар барои кори баробарарзиш" эътироф шудааст ва он дар дебочаи оинномаи ТБМ низ ифода ёфтааст. Конститусияи Ҷумҳурии Тоҷикистон муайян мекунад, ки Тоҷикистон давлати иҷтимоӣ буда, барои ҳар як инсон шароити зиндагии арзанда ва инкишофи озодонаро фароҳам меорад (қисми 3 моддаи 1). Дар моддаҳои 35 ва 37 Конститусия инчунин гуфта мешавад, ки дар Тоҷикистон меҳнат ва саломатии одамон ҳифз карда мешаванд, ҳадди ақали музди меҳнат кафолат дода мешавад.

Қонунгузории меҳнатии Ҷумҳурии Тоҷикистон принсипҳоро дар соҳаи музди меҳнат, ҳуқуқ ва ӯҳдадориҳои корманд ва корфармо, кафолатҳои давлатии музди меҳнати кормандон, аз ҷумла муқаррар намудани ҳадди ақали музди меҳнатро пешбинӣ намудааст.

Моддаи 4 Кодекси меҳнати Ҷумҳурии Тоҷикистон принсипи асосии таъмини ҳуқуқи ҳар як корманд ба пардохти саривақтӣ ва пурраи музди меҳнатро бо андозаи на камтар аз ҳадди ақали музди меҳнат, ки қонун муқаррар кардааст ва эҳтиёҷоти мавҷудаи корманд ва оилаи ӯро қонеъ карда метавонад, ифода мекунад. Ҳуқуқ ба пардохти саривақтӣ ва пурраи музди меҳнат мутобиқи тахассус, мураккабии кор, миқдор ва сифати кори иҷрошуда ба ҳуқуқҳои асосии корманд дохил мешавад (қисми 1 моддаи 18 КМ ҶТ). Корфармо инчунин вазифадор аст, ки сари вақт ва дар ҳаҷми пурра музди меҳнати кормандро пардохт намояд (қисми 2 моддаи 19 КМ ҶТ).