5. Низоми мазкур (моддаи 130 КМ ҶТ) назорати давлатиро оид ба риояи қонунгузории меҳнат ва дигар санадҳои меъёрии ҳуқуқии дорои меъёрҳои ҳуқуқӣ, аз ҷумла санҷиши пардохти пурра ва саривақтии музди меҳнат ва иҷрои кафолатҳои давлатии музди меҳнатро дар бар мегирад. Назорати мазкур қисми назорати давлатӣ оид ба риояи қонунгузории меҳнат ва дигар санадҳои меъёрии ҳуқуқии дорои меъёрҳои ҳуқуқии меҳнат мебошад, ки аз ҷониби Хадамоти назорати давлатӣ дар соҳаи меҳнат, муҳоҷират ва шуғли аҳолӣ амалӣ карда мешавад. Назорати давлатии риояи якхелаи ин меъёрҳо аз ҷониби ҳамаи корфармоён дар қаламрави Ҷумҳурии Тоҷикистон аз ҷониби Прокурори генералии Ҷумҳурии Тоҷикистон ва прокурорҳои тобеи ӯ амалӣ карда мешавад. Назорати ҷамъиятии он низ амал мекунад. Ҳамаи ин масъалаҳо дар Боби 20-уми китоб «Ҳифзи ҳуқуқ ва озодиҳои меҳнатӣ, усулҳои ҳимояи ҳуқуқ ва озодиҳои меҳнатӣ» муфассал оварда шудаанд.

6. Кафолати муҳими давлатӣ ин муқаррар намудани мӯҳлат ва пайдарҳамии пардохти музди меҳнат мебошад. Моддаҳои 158 ва 160 КМ ҶТ тартиб, ҷой ва мӯҳлати пардохти музди меҳнатро пешбинӣ менамоянд.

Ӯҳдадории корфармо ҳангоми пардохти музди меҳнат муқаррар карда шудааст, ки тибқи он бояд ҳар як кормандро дар бораи таркиби музди меҳнат дар давраи дахлдор, ҳаҷм ва асосҳои нигоҳ доштан аз он, инчунин оид ба маблағи умумии пардохтшаванда ба таври хаттӣ огоҳ созад. Ҳама маълумоти зикршуда бояд дар варақаҳои