Ба кормандони хонакори дар ноҳияҳои баландкӯҳ машғули корбуда, рухсатии ҳарсолаи иловагӣ ва дигар имтиёзҳои тибқи қонунгузорӣ барои кормандон ва хизматчиёни ин маҳалҳо муқарраргардида дода мешаванд.

Ба ғайр аз ин, ба кормандони хонакор барои собиқаи кории бефосила рухсатии ҳарсолаи иловагӣ дода мешавад, агар дар ташкилоти корфармо барои кормандон чунин рухсатӣ пешбинӣ шуда бошад. Ба онҳо тибқи муқаррароти қонунгузорӣ ҳамчун подоши иҷрои уҳдадориҳои алоҳидаи давлатӣ ва ҷамъиятӣ, рухсатиҳои иловагӣ, инчунин рухсатиҳои бемузд дода мешаванд.

16.9. Хусусияти танзими меҳнати кормандони бо кори
фосилавӣ (дистансионӣ) машғулбуда

Кори фосилавӣ (дистансионӣ) шакли муосири шуғл буда, муқаррарот доир ба танзими он бори нахуст ба Кодекси меҳнати Ҷумҳурии Тоҷикистон аз соли 2016 ворид карда шудааст (Боби 23). Тибқи КМ ҶТ зери мафҳуми кори фосилавӣ коре фаҳмида мешавад, ки берун аз маҳалли ҷойгиршавии корфармо бо истифода аз технологияи иттилоотию коммуникатсионӣ иҷро карда мешавад.

Тибқи моддаи 256 КМ ҶТ, корфармо ба корманд воситаҳои коммуникатсионӣ (воситаҳои алоқа) пешниҳод намуда, хароҷоти пайвасткунӣ ва хизматрасонии онро ба зимма мегирад. Дар ҳолатҳое, ки корманд воситаҳои коммуникатсионии худро доимо истифода мебарад, корфармо онро ҷуброн менамояд. Ҳаҷм ва тартиби пардохти он бо розигии корманд муқаррар карда мешавад.