корфармо соҳибкори инфиродӣ бошад, худи ӯ намояндаҳоро ба ҳайати комиссия таъин мекунад.

Намояндагони кормандон ба комиссияи созиш аз ҷониби маҷлиси умумии (конференсияи) кормандон ё аз ҷониби мақомоти намояндагии кормандон бо тасдиқи минбаъда дар маҷлиси (конференсияи) кормандон, интихоб карда мешаванд.

Маҷлиси умумии кормандон ҳуқуқ дорад, дар бораи таъсиси комиссияи созиш дар воҳидҳои сохтории ташкилот қарор қабул кунад, ки он метавонад баҳсҳои меҳнатии фардии дар ҳудуди ин сохтор ба вуҷуд омадаро баррасӣ кунад.

Комиссияи созиш мустақилона аз байни худ раис, муовини ӯ ва котиби комиссияро интихоб мекунад ва бояд мӯҳри худро дошта бошад. Ӯҳдадории таъминоти ташкилию техникии фаъолияти комиссия ба зиммаи корфармо гузошта мешавад.

Дар давраи иштирок дар кори комиссия, аъзои комиссия аз кори асосӣ фориг буда, музди миёнаи меҳнати онҳо нигоҳ дошта мешавад.

Корманд метавонад дар давоми се моҳ аз рӯзе, ки дар бораи вайрон шудани ҳуқуқҳояш фаҳмидааст ё мебоист дар ин бора хабардор карда мешуд, ба комиссияи созиш муроҷиат кунад (моддаи 201 КМ ҶТ). Агар корманд мӯҳлатро бо сабабҳои узрнок масалан, беморӣ, сафари хизматӣ ва ғайра гузаронад, комиссияи созиш метавонад онро барқарор намояд ва баҳсро аз рӯи моҳият ҳал кунад.