17.2. Баҳсҳои меҳнатии фардӣ ва тартиби баррасии онҳо

Комиссияи созиш вазифадор аст, ки баҳсҳои меҳнатии фардиро дар давоми 7 рӯзи тақвимӣ пас аз пешниҳоди ариза баррасӣ кунад. Баррасии баҳс ҳангоми набудани корманд танҳо бо аризаи хаттии ӯ иҷозат дода мешавад. Агар корманд ё намояндаи ӯ дар ҷаласаи комиссия ҳозир нашаванд, баррасии аризаи ӯ ба таъхир гузошта мешавад. Дар сурати бе сабабҳои узрнок ҳозир нашудани намояндаи корманд, комиссия метавонад қароре қабул кунад, ки аризаи кормандро аз баррасӣ хориҷ намояд. Ин амал кормандро аз ҳуқуқи дубора муроҷиат намудан ба комиссия маҳрум намекунад. Дар ин ҳолат, мӯҳлати баррасии баҳс дар комиссияи созиш аз лаҳзаи пешниҳоди аризаи дуюм ҳисоб карда мешавад.

Ҷаласаи комиссия салоҳиятнок ба ҳисоб меравад, агар дар он на камтар аз нисфи аъзои интихобшудаи кормандон ва на камтар аз нисфи аъзои ваколатдоршудаи корфармо иштирок кунанд. Протоколҳои ҷаласаҳои комиссияи созиш ҷараёни баҳс ва тамоми масъалаҳои ба миён омадаро инъикос мекунад, ба монанди дархостҳои тарафҳо, баҳсҳои онҳо, нишондоди шоҳидон, коршиносон, арзёбии далелҳои хаттӣ ва дигар маълумот дар бораи баҳси баррасишаванда. Протоколро раиси комиссия ва дар набудани ӯ - муовини раис имзо мегузоранд ва бо мӯҳри комиссия тасдиқ мекунанд.